СКОПЈЕ (АА) - Во пресрет на празникот Курбан бајрам, муслиманите во Северна Македонија продолжуваат со последните подготовки за празникот.

Анадолу го посети „Бит-пазар“, како и Старата скопска чаршија, каде што многу граѓани често ги прават своите последни подготовки.

Бајрамската атмосфера се чувствува и во слаткарниците и продавниците за бонбони. Не можејќи да подготват баклава дома, многу домаќинства купуваат баклава од слаткарниците, додека редици може да се видат и во продавниците за бонбони.

Интересот на граѓаните е очигледен и кај продавачите на добиток во главниот град. Цените за ситен добиток се движат од 200 до 250 евра, додека цените за крупен добиток се околу 1.500 евра.

Цената за ситен добиток според Исламската верска заедница (ИВЗ) на Северна Македонија е 190 евра.

Кенан Далип, продавач на урми, бонбони и други работи во „Бит-пазар“, во изјава за Анадолу изјави: „Оваа година работата е добра, но малку послаба поради жештината. Но, сепак се трошат бидејќи е празникот Курбан бајрам. Цените се поевтини од другите години. Но, денес, последниот ден, е малку послаб, другите денови беа подобри.“

- Ќе бидат поставени специјални контејнери за остатоците од курбаните

Во меѓувреме, во пресрет на Курбан бајрам, Општина Чаир најави дека ќе бидат поставени три специјални контејнери за фрлање на остатоците од курбаните, на три локации низ целата општина, и тоа во Серава, Дуќанџик и Чаир.

„Ве повикуваме да ги фрлате остатоците од курбаните исклучиво на овие определени локации, со цел да ја зачуваме јавната чистота, заедничкото здравје и достоинството на празникот. Ви благодариме за разбирањето и соработката“, велат од Општина Чаир.

И Јавното претпријатие Комунална хигиена - Скопје најави дека ќе постави специјални контејнери во коишто граѓаните ќе можат да го одложат органскиот отпад (остатоците од курбанот).

„ЈП Комунална хигиена - Скопје апелира до верниците да го одлагаат органскиот отпад исклучиво во поставените садови, затоа што неговото исфрлање на јавни површини може сериозно да го загрози јавното здравје и да ја загади животната околина“, велат оттаму.

Ритуалот за Курбан бајрам започнува со специјалната бајрамска молитва низ џамиите, потоа продолжува со колење на жртвеното животно за оние кои имаат можност, и завршува со посети на роднините, соседите, пријателите и познаниците.

ИВЗ објави дека централниот настан ќе се одржи во Мустафа-пашината џамија во Скопјe в петок, 6 јуни, додека бајрамската молитва ќе се изврши во 5:39 часот.